Knattspyrnusamband Íslands hefur sent frá sér yfirlýsingu vegna skrifa blaðamanns Morgunblaðsins. Kristófer Kristjánsson skrifaði þar í gær pistil um ákvörðun stjórnar sambandsins að blása öll Íslandsmót af.
Kristófer var harðorður í garð KSÍ fyrir að blása öll Íslandsmót af og skrifar. „Það er súrt að hugsa til þess að, ef ástandið í samfélaginu skánar á næstu misserum og aðstæður leyfa að knattspyrnan hefjist aftur, þá geta æfingamótin í Egilshöllinni farið fram óáreitt í vetur á meðan Íslandsmótið sjálft var útkljáð eftir vilja og geðþótta stjórnarmanna knattspyrnusambandsins, en ekki í anda íþróttarinnar sjálfrar eða samkvæmt lögum sambandsins. Í Laugardalnum hafa menn víst talið að stundum brjóti nauðsyn lög,“ skrifar Kristófer á vef Morgunblaðsins.
Kristófer efast einnig um hæfni stjórnar KSÍ. „Öll umfjöllun um hæfisreglur í lögum KSÍ er þó hugsanlega ekkert annað en dauður bókstafur. Meginþorri stjórnarmanna KSÍ hafði ríka hagsmuni af ákvörðuninni 30. október vegna fyrrverandi tengsla við þau félög sem högnuðustu af niðurstöðunni. Hefði ekki verið eðlilegt að þessir aðilar hefðu lýst sig vanhæfa á þeim fundi sem ákvörðunin var tekin á? Þessum sömu aðilum yrði væntanlega fengið að skipa nýja dómara við áfrýjunardómstólinn, færi svo að þeir sem þar sitja nú þegar gætu ekki tekið málið til meðferðar vegna vanhæfis.“
Hann fer svo einnig yfir úrskurð aga og úrskurðarnefndar KSÍ sem hefur vísað frá kærum Fram og KR vegna málsins.
Sambandið svarar þessu og þar segir meðal annars. „Það eru mikil vonbrigði og hreinlega dapurlegt að lesa einhliða skoðanapistil blaðamanns Morgunblaðsins um málið, þar sem vinnubrögð kjörinna fulltrúa knattspyrnuhreyfingarinnar eru gerð tortryggileg, og hæfi þeirra og heilindi dregin í efa. Það hlýtur að vera sjálfsögð krafa, þegar fjallað er um erfið og flókin mál eins og þetta, að leita upplýsinga um allar hliðar frá fulltrúum KSÍ, eða öðrum fulltrúum knattspyrnuhreyfingarinnar eins og við á hverju sinni.“
Yfirlýsing KSÍ sem birtist á MBL.is
Að gefnu tilefni og vegna skoðanapistils blaðamanns Morgunblaðsins sem birtist á mbl.is í gærkvöld þá vill KSÍ koma eftirfarandi á framfæri:
Varðandi einróma ákvörðun stjórnar KSÍ um mótslok þá vill stjórn KSÍ árétta að hún hafði skýra tilvísun og lagastoð í 44. grein laga KSÍ um aðgerðir þegar meiri háttar utanaðkomandi atburðir krefjast þess. Áhrif Covid-19 eru öllum ljós í samfélaginu og á sviði íþrótta innanlands sem erlendis. Sú staða sem hreyfingin fann sig í var mjög erfið. Stjórnin hafði sett sérstaka reglugerð sem samþykkt var í júlí eftir víðtækt samráð og m.a. var leitað eftir afstöðu aðildarfélaganna og stjórnar ÍTF um mótslok.
Reglugerðin var síðan kynnt og birt aðildarfélögunum, en almenn sátt var um þá nálgun sem þar kom fram. Það var vandað til verka með aðkomu sem flestra, og hugað að ýmsum málum sem ákvörðun um framhald eða lok móts myndi hafa mikil áhrif á, eins og t.d. samninga leikmanna og þjálfara, félagaskipti leikmanna og margt fleira, svo sem vallaraðstæður og veðurfar.
Það er síðan aga- og úrskurðarnefnd sem kjörin er af aðildarfélögunum á ársþingi KSÍ, æðsta stjórnvaldi hreyfingarinnar, sem hefur komist að niðurstöðu skv. þeirra skilningi á lögum KSÍ sem félögin hafa samþykkt á ársþingi að fengnum auknum meirihluta félaganna hverju sinni.
Það eru mikil vonbrigði og hreinlega dapurlegt að lesa einhliða skoðanapistil blaðamanns Morgunblaðsins um málið, þar sem vinnubrögð kjörinna fulltrúa knattspyrnuhreyfingarinnar eru gerð tortryggileg, og hæfi þeirra og heilindi dregin í efa. Það hlýtur að vera sjálfsögð krafa, þegar fjallað er um erfið og flókin mál eins og þetta, að leita upplýsinga um allar hliðar frá fulltrúum KSÍ, eða öðrum fulltrúum knattspyrnuhreyfingarinnar eins og við á hverju sinni.
