Bæði Pep Guardiola og Kevin De Bruyne ræða nú við forráðamenn Manchester City um að framlengja dvöl þeirra hjá félaginu.
Meiri pressa er á forráðamönnum City að klára samning við Guardiola en samningur hans er á enda næsta sumar. Hann hefur verið orðaður við endurkomu til Barcelona.
De Bruyne er með samning til 2023 en vill framlengja dvöl sína og það vilja forráðamenn City líka.
„Ég er ánægður í Manchester, ég er hjá góðu félagi með góða eigendur. VIð erum að ræða saman en það er ekki langt komið. Ég sé sjálfur um viðræðurnar núna,“ sagði miðjumaðurinn knái.
„Ég vil vera áfram hjá City svo þetta eru ekki flóknar viðræður. Ég væri með aðstoðarmann ef ég vildi fara frá félaginu en þetta er einfallt.“
De Bruyne er einn besti miðjumaður í heimi og hefur verið algjör lykilmaður hjá City síðustu ár.