Á áttunda tímanum í gær hafði lögreglan afskipti af tveimur mönnum sem fóru á milli verslana í miðborginni og sögðust vera smitaðir af COVID-19. Það reyndist ekki vera rétt. Mennirnir voru frjálsir ferða sinna eftir viðræður við lögregluna.

Tilkynnt var um fjórar líkamsárásir í gærkvöldi og nótt. Þrír voru handteknir vegna málanna og fluttir í fangageymslu.

Á áttunda tímanum í gærkvöldi var tilkynnt um eld í leiktækjum á lóð Vatnsendaskóla.  Eldurinn læsti sig einnig í klæðningu skólans. Slökkvilið slökkti eldinn, minniháttar tjón hlaust af eldinum.

Tveir voru handteknir í austurborginni í gærkvöldi, grunaðir um fíkniefnamisferli. Þeir voru látnir lausir að skýrslutöku lokinni.

Einhver eða einhverjir þurftu að fá útrás fyrir óeðlilegar hvatir og brutu allar rúður í tveimur strætóskýlum í austurborginni. Málið er í rannsókn.

Einn ökumaður var handtekinn, grunaður um ölvun við akstur. Sökum ástands ökumannsins var hann vistaður í fangageymslu.

Töluvert mörg útköll voru vegna ölvunar og hávaða í nótt á höfuðborgarsvæðinu.