Æviminningar Bryndísar Schram, undir heitinu Brosað í gegnum tárin, hafa vakið mikla athygli. Þar tekur hún víða til varna fyrir eiginmann sinn, Jón Baldvin Hannibalsson, fyrrverandi ráðherra og sendiherra, fyrir ýmsar ávirðingar sem bornar hafa verið á hann í gegnum árin.
Bryndís vísar meðal annars á bug ásökunum á Jón Baldvin um kynferðislega áreitni. Segir hún öðru nær að hún hafi oft orðið að verja mann sinn fyrir ágangi kvenna. Á blaðsíðu 206 segir:
„En konur hafa svo sem ekki hikað við að leita á manninn minn hvað eftir annað – og það fyrir framan nefið á mér – alveg blygðunarlaust. Ég var minnt á það um daginn, að einhvern tíma endur fyrir löngu í samkvæmi blaðamanna, þegar Jón Baldvin var ritstjóri Alþýðublaðsins, á ég að hafa hellt úr heilli vatnskönnu yfir þekkta blaðakonu, þegar hún gerðist áleitin við manninn minn undir borðum – með þeim afleiðingum, að hárgreiðslan eyðilagðist – og kvöldið þar með fyrir hinni ungu konu.
Einu sinni þurfti ég að henda annarri þekktri blaðakonu út úr húsi okkar á Vesturgötunni, þegar hún var farin að þreifa ansi djarflega á manninum mínum – og komst svo að orði að ég væri búin að eiga hann svo lengi – og nú væri röðin komin að sér!
Í þriðja sinn þurfti ég svo að grípa til þess ráðs að vekja yngstu dóttur mína um miðja nótt og biðja hana að hjálpa mér að draga konu undan hjónarúminu okkar á Vesturgötunni. Sú kona hafði falið sig þar til þess að koma Jóni Baldvini „á óvart“, þegar við værum endanlega lögst til hvílu. Ég sá þá konu aldrei aftur.“
Þess má geta að stór hópur kvenna hefur stigið fram og sakað Jón Baldvin um kynferðislega áreitni. Ríkissaksóknari hefur gefur út ákæru vegna eins máls, en hún snertir kæru Carmenar Jóhannsdóttur vegna atviks sem átti sér stað sumarið 2018.
Bryndís segir einnig að sögur um drykkjuskap Jóns Baldvins séu rangar. „… Jón Baldvin er hvorki ofbeldissegur né drykkjubolti,“ segir Bryndís á blaðsíðu 208 og ennfremur:
„Á ráðherraárum Jóns Baldvins, þegar hann vann gjarnan myrkranna á milli, verður því seint haldið fram, að vínneysla hafi truflað störf hans. Hefur nokkur stjórnmálamaður á okkar tíð komið jafnmiklu í verk á jafnskömmum tíma? Varla hefði hann getað það sífullur? Eða hvað?“
