Svo virðist sem minnst þriggja daga bið sé á heimsendingu matvæla úr netverslun Nettó. Næsti lausi tími fyrir heimsendingu þegar þetta er skrifað er á sunnudaginn klukkan 14:00. Það sama er upp á teningnum hjá Krónunni. Sprenging varð í eftirspurn eftir matvælum í netverslunum Nettó, Krónunnar og Heimkaupa þegar yfirvöld kynntu hertar sóttvarnaraðgerðir og að 99 hefðu greinst á einum og sama deginum. Sagði Fréttablaðið frá því í morgun að Heimkaup gætu ekki lengur boðið upp á afhendingu samdægurs vegna álags.
Hafði Fréttablaðið eftir Gunnari Agli Sigurðssyni, framkvæmdastjóra verslunarsviðs Samkaupa sem reka Nettó verslanirnar að eftirspurnin hafi sprungið eftir fréttirnar um smitin og að skýr fylgni væri á milli slæmra frétta af faraldrinum og eftirspurnar hjá netverslun Nettó. Fór salan upp um 50% á einum degi.
Meðal „tilmæla“ ríkislögreglustjóra er að aðeins einn úr hverju heimilishaldi sjái um innkaupin hverju sinni, og að fólk reyni að halda sig eins mikið heima og það getur.
Þá hafði Fréttablaðið eftir Guðmundi Magnasyni, framkvæmdastjóra Heimkaupa, að fylgni væri milli sölulínurits í netverslun og fjölda smita. „Fylgnin er rosalega mikil.“
Í fyrstu bylgju Covid smita hér á landi fór eftirspurn í netverslunum um allt land í hæstu hæðir og voru dæmi um að matarsendingar bárust ekki fyrr en viku eftir að pöntunin var gerð. Svo virðist sem verslanirnar séu talsvert betur undirbúnar undir þessa bylgju, en allar helstu matvöruverslanir á netinu segjast vera að efla dreifigetu sína.
