„Ég lenti inni á Landspítalanum í gærkvöld. Ég fer í lungnasneiðmynd á eftir og þá kemur þetta betur í ljós. Ég fékk veirulyf í gærkvöld en ég hafði sýnt bólgueinkenni. Þeir ætla að taka blóðsýni í dag þannig að ég veit meira um þetta seinna í eftirmiðdaginn,“ segir Selfyssingurinn Auður Tinna Hlynsdóttir í viðtali við DV. Hún er núna á sjötta degi COVID-19 sjúkdómsins en í gærkvöld versnaði ástand hennar.
Auður ræddi við DV í síma, rödd hennar hljómaði eins og í manneskju sem er þungt haldin af flensu. Hún telur hins vegar COVID-19 vera eitthvað annað og miklu meira en flensu og henni gremst kæruleysislegt tal um sjúkdóminn. Mánuðum saman áður en Auður greindist með veiruna var hún að ergja sig yfir útbreiddu kæruleysi fólks í kringum hana varðandi smitvarnir. Sjálf lagði hún þunga áherslu á smitvarnir og þykir henni kaldhæðnislegt að hún hafi þrátt fyrir það smitast af veirunni og sent mörg hundruð manns í sóttkví. En veiran fer ekki í manngreinarálit eins og Auður bendir á í áhugaverðri frásögn sinni á Facebook sem lesa má með því að smella á tengil undir þessari frétt.
„Ég, dætur mínar tvær og fyrrverandi eiginmaður minn greindust öll með veiruna í sýnatöku. Ég starfa á sérdeild í Sunnulækjarskóla og stelpurnar mínar eru þar í 1. og 4. bekk. Þar sem samgangur er í matsal þurfti að senda svo marga í sóttkví,“ segir Auður. Sýnataka hjá þessum stóra hópi sem tengist Sunnulækjarskóla verður á morgun en Auður hefur ekki heyrt um neinn sem hafi fundið fyrir einkennum.
Þess má geta að Auður útskrifast sem þroskaþjálfi í vor og starfar hún á því sviði á sérdeildinni í Sunnulækjarskóla.
Að sögn Auðar eru dætur hennar með mjög lítil einkenni, aðeins hún virðist hafa veikst alvarlega. En hún er ung og hraust kona og því er hennar reynsla dæmi um hvað veiran er óútreiknanleg og getur verið hættuleg.
„Þegar ég heyri svona tal eins og það sé best að klára þessa flensu, þá verð ég reið, halló, þetta er engin flensa!“ segir Auður, alvarleg í rómnum. Hún biður fólk um að taka fyrirmæli Almannavarna mjög alvarlega og sýna ábyrgð.
Í frásögn Auðar kemur fram vitnisburður um yndislegan samfélagsandi á Selfossi. Henni hafi liðið illa yfir því að verða valdur að því að 600 manns fóru í sóttkví og „næstum heilt bæjarfélag fór á hliðina“ eins og hún orðar það, þrátt fyrir að hafa ávallt farið varlega og gætt að smitvörnum. En enginn hefur álasað henni fyrir þetta og hún hefur eingöngu mætt hlýhug og hjálpsemi á Selfossi. „Við vorum á öðrum degi í einangrun þegar eigandi ísbúðar Huppu hringdi og vildi gefa mér og stelpunum ís fyrir utan tröppurnar, hversu fallegt og yndislegt samfélag sem ég bý í hér á Selfoss,“ segir meðal annars í frásögn Auðar sem lesa má með því að smella á tengilinn hér að neðan.
https://www.facebook.com/permalink.php?story_fbid=10158922705744310&id=567589309
