Svandís Svavarsdóttir heilbrigðisráðherra hefur fallist á tillögu Þórólfs Guðnasonar, sóttvarnarlæknis, um að framlengja tímabundna lokun skemmtistaða og kráa til og með sunnudagsins 27. september næstkomandi.
Þórólfur telur brýnt að framlengja lokuninni þar sem ekki hafi enn tekist að ná að fullu utan um aukningu smita undanfarna daga sem má að miklu rekja til viðveru smitaðra á skemmtistöðum. Í minnisblaði Þórólfs segir:
„Þar sem að ekki hefur tekist að ná að fullu utan um ofangreindan faraldur þá tel ég brýnt að krár og skemmtistaðir verði áfram lokaðir til og með 27. september 2020. Ég tel ekki ástæðu til að loka veitingahúsum og kaffistöðum þar sem að gestir sem þar eru, eru að jafnaði í ástandi sem leiðir til betri sóttvarna. Sömuleiðir er heildarfjöldi gesta á þessum stöðum minni sem minnkar líkur á smiti.“