Andri Birgisson, framkvæmdastjóri staðarins, greinir frá þessu í tilkynningu á Facebook-síðu Brewdog. „Við fengum þær upplýsingar frá smitrakningateymi síðdegis á fimmtudag að hugsanlega hafi smitaður viðskiptavinur komið til okkar föstudaginn 11. september,“ segir Andri en allt starfsfólk staðarins fór í skimun í gær.
„Fyrr í dag fékk svo einn starfmaður okkar símtal um að hann væri smitaður af COVID-19. Allt annað starfsfólk fékk neikvæða útkomu. Þessi umræddi starfsmaður var síðast á vakt um síðustu helgi, var bæði föstudag og laugardag, og hefur ekki komið inná staðinn síðan. Grunur leikur á að hann hafi smitast af gesti frá þessum föstudegi.“
Andri segir að í kjölfar þessarar vitneskju hafi verið unnið þétt meeð smitrakningarteyminu. „Allir starfsmenn voru sendir í skimun ásamt þeim viðskiptavinum sem smitrakningateymið hafði samband við,“ segir Andri og hvetur alla viðskiptavini Brewdog sem voru á staðnum á föstudaginn 11. september eða laugardaginn 12. september til þess að fara í skimun. Nánari upplýsingar um viðbrögð er að finna á covid.is og heilsuvera.is. „Pössum fjarlægðamörk, sprittum okkur og verum öðrum til fyrirmyndar. Stay safe,“ segir Andri að lokum.
Viðskiptavinir staðarins eru ánægðir með þessa upplýsingagjöf staðarins og hrósa henni í athugasemdum færslunnar. „Þið eruð frábær, til fyrirmyndar hjá ykkur eins og allt sem þið gerið,“ segir í einni athugasemd. „Vel gert og virðingarvert – megi ykkur farnast sem allra best og vonandi jafnar starfsmaðurinn sig fljótt og vel,“ segir í annarri.
