„Staðfest hefur verið að fjórir nemendur HR hafi greinst með Covid-smit, til viðbótar við þá tvo sem greint var frá í gær.“ Þannig hefst póstur Eiríks Sigurðssonar til nemenda HR sem hann sendi rétt í þessu.
Samkvæmt tölvupóstinum er ekki vitað til þess að nemendurnir séu alvarlega veikir og segist Eiríkur vona að svo verði áfram. Fimm af sex smitunum eru innan sama nemendahóps, og virðist því ekki vera um útbreitt smit að ræða að sögn Eiríks. „Sá hópur og kennarar hans stunda nám og vinnu heiman frá sér og koma ekki í HR meðan smitrakningateymi vinnur að rakningu og ákvörðun um hverjir fari í sóttkví,“ segir Eiríkur í tölvupóstinum.
Eiríkur lýkur tölvupóstinum á að segja að Íslensk erfðagreining hafi boðist til þess að skima nemendur og starfsfólk HR og hyggst skólinn þiggja það góða boð.
19 greindust með Covid-smit í gær á Íslandi og 13 daginn þar áður. Ekki hafa svo margir greinst síðan í apríl.