Kristján Óli Sigurðsson sérfræðingur Dr. Football og fyrrum kantmaður Breiðabliks kallar eftir því að Óskar Hrafn Þorvaldsson þjálfari liðsins setji Anton Ara Einarsson markvörð liðsins á bekkinn.
Anton Ari er á sínu fyrsta ári í marki Breiðabliks en hefur mátt þola gagnrýni fyrir frammistöðu sínar. Anton Ari stóð vaktina í marki Blika í 4-2 tapi gegn KR í gær.
,,Ég væri löngu búinn að setja manninn í smá kælingu, það eru allir leikmenn sem hafa nánast dottið út úr liðinu nema Mikkelsen og þessi markvörður. Hann varði tvö skot í gær, annað var varið beint út í teig og skorað úr frákastinu,“ sagði Kristján Óli í Dr. Football í dag.
Kristján segist ekki þola það að sjá Anton á velli, hann segir hann tala lítið og að Anton stýri vörninni ekki. ,,Áran yfir þessum gæa er núll, varnarmennirnir treysta honum ekki í sekúndu. Hann stýrir ekki vörninni, hann er mállaus. Ef ég hata eitthvað við markvörð er það málleysi.“
Hjörvar Hafliðason fyrrum markvörður telur að Óskar gæti skipt um markvörð,,Ég get tekið undir það að Óskar gæti farið að skoða þessa stöðu í næsta leik.“ Brynjar Atli Bragason og Gunnleifur Gunnleifsson eru í herbúðum félagsins.