„Ég undrast það að forysta Þjóðkirkjunnar skuli alltaf vera að leita að því sértæka og leggja rækt við það á kostnað þess almenna, og víli ekki fyrir sér að meiða og særa og hneyksla þorra kristinna manna í landinu, bæði í Þjóðkirkjunni og öðrum kirkjudeildum. Þessar kirkjudeildir hafa allar svipaða mynd af Jesú, það er sú mynd sem birtist í biblíunni,“ segir Geir Waage, sóknarprestur í Reykholti í Borgarfirði, í viðtali við DV, þar sem hann viðrar mikla óánægju með umdeilda mynd sem Biskupsstofa hefur birt undanfarið þar sem barnastarf er auglýst. Myndin sýnir Jesú Krist með brjóst undir regnboga.

„Kirkjunni er ætlað að boða fagnaðarerindið í anda vorrar lúterks- evangelísku kirkju, ég er að tala um þjóðkirkjuna þá. Það er almennt erindi, því þjóðkirkjan er heilög, almenn kirkja, ekki klúbbur um eitthvað sértækt út og suður,“ segir Geir en hann telur myndina ekkert hafa að gera með boðun fagnaðarerindisins heldur sé um auglýsingamennsku að ræða:

„Það skiptir máli hvernig athygli er vakin á málstað. Með þessu er ekki verið að vekja athygli á málstað kirkjunnar sem er boðun fagnaðarerindisins. Það er verið að vekja athygli á einhverri stofnun, á einhverju fyrirtæki, til góðs og ills. Hver er tilgangurinn? Hver er merkingin? Að láta taka eftir sér eða að koma einhverju á framfæri?“ segir Geir.

Sá sem hefur kynnt framtakið er Pétur G. Markan, samskiptastjóri Þjóðkirkjunnar. Geir telur að Agnes M. Sigurðardóttir, biskup Íslands, hafi komið þarna hvergi nærri:

„Ég hef enga trú á því að frumkvæðið að þessu hafi komið frá biskupi Íslands, ég þekki hana. Hún hefur ekki átt frumkvæðið að þessu. Það mætti segja mér að þetta særði hana ekki minna en aðra. Ég ætla samt ekki að svara fyrir hana, ég svara ekki fyrir samvisku annarra manna. En það kæmi mér mjög á óvart að hún hafi átt upptökin að þessu. Hún ber hins vegar ábyrgðina og það særir mig til viðbótar erindinu sjálfu.“

Geir segir að málið hljóti að koma til kasta Kirkjuþings sem haldið verður þann 10. september. Hann mun sjálfur koma þar hvergi nærri því hann sé ekki lengur á kirkjuþingi. „Mér þætti með ólíkindum ef málið yrði ekki tekið upp á þinginu.“