„Við höfðum ekki hugmynd um að þessi lyf gætu verið hættuleg. Við komumst mjög nálægt því að missa hann,“ segir norsk móðir að nafn Stine Kråkenes Øvrelid. Þegar að 11 mánaða sonur hennar hafði verið með hlaupabólu í rúma viku ákvað hún að gefa honum verkjalyfið Nurofen til að slá á kvalirnar en afleiðingarnar voru þær að einkennin urðu margfalt alvarlegri og endaði drengurinn að lokum í öndunarvél. Stine deildi ljósmyndum af syni sínum á facebook í dögunum í þeim tilgangi að vara aðra foreldra við lyfinu.

Nurofen er bólgueyðandi lyf með verkjastillandi og hitalækkandi verkun og inniheldur virka efnið íbúprófen. Lyfið er meðal annars notað til að lækka hita hjá börnum en í fylgiseðli lyfsins er tekið fram að forðast skuli notkun lyfsins þegar börn hafa hlaupabólu.

Umrædd facebookfærsla Stine hefur vakið talsvert umtal í Noregi og hefur verið greint frá málinu í þarlendum miðlum. Atvikið átti sér stað fyrir rúmu ári en það var ekki fyrr en nú á dögunum að Stine ritaði færsluna í forvarnarskyni.

Í samtali við NRK segir Stine að hún hafi áður reynt að gefa syni sínum Isaac paracetamol til að slá á verkina en þegar það dugði ekki til gaf hún honum verkjalyfið Nurofen. Í kjölfarið urðu útbrot hans margfalt verri, hann fékk sýkingu í húð, átti í erfiðleikum með að anda og veiktist í kjölfarið af lungabólgu.

Ljósmynd/Facebook.

Var hann fluttur með hraði á bráðamóttöku Haukeland háskólasjúkrahússins í Bergen þar sem hann var í öndunarvél í níu daga. Eftir það tóku við tvær vikur á gjörgæslu og tvær vikur á barnadeild áður Isaac fékk loks að fara heim og þá leið töluverður tími þar til hann var fær um að ganga og borða sjálfur. Í samtali við NRK segir Stine að veikindi sonarins hafi verið „löng barátta“ en hann sé orðinn fullfrískur í dag.

Í samtali við TV2 segir Steinar Madsen, yfirmaður hjá Norska Lyfjaeftirlitsstofnuninni að „smávægilegur“möguleiki sé á því að einkenni hlaupabólu geti snarversnað við inntöku á verkjalyfjum sem innihalda íbúprófen og geti afleiðingarnar þá orðið alvarlegar. Þá tekur hann fram að stofnunin vinni nú að því að uppfæra leiðbeiningarnar sem fylgja lyfinu og gera þær skýrari hvað þetta atriði varðar.

Franziskus Johannes Bosse, yfirlæknir á barnaspítalanum í Haukeland tekur undir fullyrðingu Madsen í samtali við NRK og vísar í nýlegar rannsóknir. Brýnir hann fyrir foreldrum gefa börnum sínum ekki lyfið á meðan þau eru með hlaupabólu þar sem það getur meðal annars leitt til alvarlegrar streptókokkasýkingar. Þá segir Marianne Hunn, barnalæknir á Háskólasjúkrahúsinu í Osló að ávallt sé mælt með því að gefa börnum með hlaupabólu með parasetamól til að slá á verki og lækka hita.