Í gærkvöldi höfðu lögreglumenn afskipti af tveimur veitingastöðum í miðborginni þar sem tveggja metra reglan var ekki virt. Starfsmenn staðanna brugðust við og færðu borð og stóla og báðu gesti um að færa sig til að tryggja að reglurnar væru virtar. Skýrsla var rituð um málið.

Í gærkvöldi höfðu lögreglumenn afskipti af manni í Breiðholti. Þegar ræða átti við manninn hljóp hann af stað en laganna verðir náðu honum. Hann er grunaður um vörslu fíkniefna og að hafa ekki farið að fyrirmælum lögreglu.

Skömmu síðar var maður handtekinn í Breiðholti vegna gruns um að hann væri að rækta fíkniefni. Hald var lagt á rúmlega 20 plöntur auk tilbúinna efna og tækja. Maðurinn var vistaður í fangageymslu.

Ekið var á kind og tvö lömb á Kjósarskarðsvegi í gærkvöldi. Flytja þurfti bifreiðina á brott með dráttarbifreið.

Tveir ökumenn voru handteknir í nótt, grunaðir um að vera undir áhrifum áfengis og fíkniefna. Annar þeirra er einnig grunaður um vörslu fíkniefna og að hafa ekið sviptur ökuréttindum.

Umferðaróhapp varð í Kópavogi í nótt og reyndist ökumaður, sem átti aðild að því, vera sviptur ökuréttindum.