Undanfarið hefur mikið borið á þjófnaði á höfuðborgarsvæðinu, samkvæmt tilkynningu frá lögreglu. Þykir lögreglu því rétt að minna fólk á að vera á varðbergi.

Helst er um að ræða þjófnað á reiðhjólum rafmagnshlaupahjólum og vespum en einnig hefur töluvert borið á innbrotum í bíla og byggingarsvæði.

„Fólk er því hvatt til að geyma hjól og vespur innandyra, ef það hefur tök á, og umráðamenn ökutækja eru minntir á að hafa ekki hluti í augsýn, sem kunna að freista þjófa. Viðbúið er að hinir illa fengnu hlutir séu boðnir til kaups og því nauðsynlegt að hafa varan á.“ 

Lögregla hvetur fólk til að hafa samband verði það vart við grunsamlegar mannaferðir og er sömuleiðis hvatt til að fólk taki ljósmyndir ef slíkt er mögulegt og eins taki niður bílnúmer eða skrifi niður lýsingu á grunsamlegum aðilum.

„Upplýsingum má koma á framfæri í síma 444-1000, með einkaskilaboðum á fésbókarsíðu Lögreglunnar á höfuðborgarsvæðinu eða í tölvupósti á netfangið abending@lrh.is Ef óskað er eftir skjótri aðstoð lögreglu vegna yfirstandandi innbrots skal undantekningarlaust hringja í 112.“