Hlé verður gert bæði á æfingum og leikjum í íþróttum með snertingu, að minnsta kosti til 13. ágúst næstkomandi. Þetta á við um knattspyrnu og munu því engar æfingar fara fram hjá knattspyrnuliðum á þessum tíma.

Þetta kemur fram í tilkynningu sem ÍSÍ gaf út í dag. „Á hádegi í dag, 31. júlí, tók gildi ný auglýsing heilbrigðisráðherra um takmörkun á samkomum vegna farsóttar og er gildistími hennar til 13. ágúst næstkomandi. Markmið breytinganna sem nú taka gildi er að hægja eins og unnt er á útbreiðslu COVID-19 sjúkdómsins, sem því miður er nú aftur í vexti hér á landi,“ segir í tilkynningunni.

„Breytingarnar fela meðal annars í sér að fjöldasamkomur, þar sem fleiri en 100 einstaklingar koma saman, eru óheimilar á gildistíma auglýsingarinnar. Gilda reglurnar jafnt um opinber rými sem og einkarými og eru íþróttaviðburðir þar með taldir.“

Þá kemur fram að reglurnar taki ekki til barna sem fædd eru árið 2005 eða síðar og geta því æfingar yngri flokka haldið áfram.