Fangavarðafélagið sendi rétt í þessu frá sér afdráttalausa tilkynningu þar sem lokun fangelsisins á Akureyri er mótmælt harðlega. Segir félagið lokunina stangast á við yfirlýsta stefnu um fjölgun starfa á landsbyggðinni og bendir á að sex störf muni tapast fyrir norðan.

Áratugareynsla muni tapast við þessar aðgerðir ásamt verðmætri tengingu við lögregluna, segir í tilkynningunni og bendir félagið á farsælt samstarf lögreglu og fangavarða í áraraðir. Fangelsið og lögreglan á Akureyri eru í sama húsi í bænum, en fangelsið var endurbyggt árið 2008 og þykir vel útbúið.

Segir jafnframt í tilkynningunni:

Samkvæmt tölum Þjóðskrár um íbúafjölda landsins í janúar 2020 búa um 13,3% landsmanna á norðurlandi vestra, norðurlandi eystra og austurlandi. Það er því í lófa lagt að þessir landshlutar hafi fangelsi í nærumhverfinu, bæði til að vista gæsluvarðhaldsfanga og afplánunarfanga.

Stór hluti af betrun fanga eru bætt samskipti við fjölskyldu og vini. Þau samskipti styrkjast hvað mest þegar aðstandendur geta heimsótt fangana. Gott aðgengi og stuttur ferðatími skiptir því miklu máli.

Þá bendir félagið á í tilkynningunni að kostnaður gæti aukist til muna við flutning á gæsluvarðahaldsföngum, en einu starfandi gæsluvarðahaldsfangelsi landsins verða þá sunnanheiða, á Hólmsheiði og á Litla hrauni. Fyrir lokun var eitt gæsluvarðahaldspláss í fangelsinu á Akureyri. „Við eigum því bágt með að skilja í hverju sparnaðurinn felst,“ segja fangaverðir.

Fangaverðir segjast hafa skilning á niðurskurðarkröfu sem ríkið hefur viðhaft ár eftir ár og að Fangelsismálastofnun sé fyrir vikið sniðinn ansi þröngur stakkur:

Fangavarðafélag Íslands sýnir því fullan skilning að Fangelsismálastofnun hefur sætt niðurskurðum ár eftir ár og er sniðinn ansi þröngur stakkur í fjárútlátum. Það hefur kostað hinar ýmsu sparnaðaraðgerðir, eins og t.d. lokun á öryggisdeild á Litla-Hrauni og nú lokun fangelsisins á Akureyri.

Við skorum því á stjórnvöld að auka fjárheimildir til fangelsiskerfisins í heild, svo hægt sé að reka þetta mikilvæga kerfi með sóma og snúa við þeirri óheillaþróun sem nú á sér stað.