Franck Ribery, leikmaður Fiorentina, hefur gefið sterklega í skyn að hann sé að kveðja félagið eftir stutt stopp.
Ribery hefur staðið sig með prýði síðan hann kom á frjálsri sölu eftir mörg góð ár hjá Bayern Munchen.
Brotist var inn til Ribery eftir leik við Parma um helgina og tóku ræningjarnir dýrmæta hluti af heimili leikmannsins.
,,Eftir sigurinn gegn Parma þá kom ég heim. Þetta ‘heimili’ á Ítalíu, í landi sem ég ákvað að velja eftir mörg falleg ár í Munchen,“ sagði Ribery á samskiptamiðlum.
,,Þetta er það sem ég komst að. Eiginkonan mín tapaði nokkrum töskum og skartgripum. Mér líður eins og ég sé nakinn.“
,,Ég get ekki sætt mig við þetta. Sem betur fer voru eiginkona mín og börn örugg í Munchen en hvernig getum við treyst umhverfinu eftir þetta?“
,,Hvernig getur okkur liðið vel eftir þetta? Ég elti ekki peningana en ég elti boltann því það er mín ástríða.“
,,Ástríða eða ekki þá er fjölskyldan í fyrsta sæti. Við munum taka þær ákvarðanir sem þarf að taka.“