Víðir Reynisson, yfirlögregluþjónn, ræddi stuðningsmótmælin sem haldin voru í seinustu viku vegna kynþáttamismunar og lögregluofbeldis, einkum vegna morðsins á George Floyd. Víðir sagði á upplýsingafundinum sem nú stendur  yfir að umrædd mótmæli hefði verið brot á samkomubanni, en að lögregla hefði ákveðið að best væri að grípa ekki inn í.

„Það hefur alveg komið skýrt fram að það er tvö hundruð manna samkomubann. Þarna var framið samkomubrot. Það var metið þannig að það myndi hafa verri afleiðingar að reyna að brjóta upp samkomuna. Þarna var tvö hundruð manna samkomubann í gildi. Skipuleggjendur þessarar uppákomu höfðu reiknað með að það kæmu tvö hundruð manns á svæðið, en það komu miklu fleiri og var það mat lögreglunnar að skynsamlegast væri eins og staðan var þarna að grípa ekki inn í þetta.“

Víðir sagði að lögreglan hefði lært af þessum mótmælum og að nú þyrftu skipuleggjendur að taka ábyrgð á fjölda mótmælenda.

„Við höfum síðan í framhaldinu tekið þetta sem góðan lærdóm af því hvernig við munum í samskiptum við aðra skipuleggjendur haga upplýsingagjöf og hvernig þeir þurfa að taka ábyrgð á því að takmarka aðgengi að sínum viðburðum.“