Á miðnætti í gærkvöld lauk sóttkví hjá um 20 manna hópi nemenda við Heiðarskóla, leik- og grunnskóla Hvalfjarðarsveitar. Smit eins nemanda í byrjun mánaðarins olli því að að senda þurfti yfir 20 manns í sóttkví.

Það vildi hins vegar til happs að nemendum og starfsmönnum skólans hafði verið skipt í fjögur aðgreind hólf samkvæmt tilmælum stjórnvalda. Þess vegna þurfti bara að senda nemendur og starfsfólk úr einu hólfi skólans í sóttkví.

Í sóttkvínni greindist einn einstaklingur til viðbótar með kórónuveirusmit.

Sigríður Lára Guðmundsdóttir skólastjóri er mjög ánægð með hvernig til tókst með sóttvarnir í skólanum og hvað það reyndist vel að fylgja fyrirmælum yfirvalda hvað varðar sóttvarnir. Segir hún mikla ánægju ríkja í skólanum núna þegar flestir snúa til baka út sóttkví og nemendur og starfsfólk horfi björtum augum til framtíðar:

„Frá upphafi vann skólinn í einu og öllu eftir tilmælum og leiðbeiningum stjórnvalda um takmarkanir skólastarfs og var starfsmönnum og nemendum skólans skipt í fjögur aðgreind hólf.  Sú aðgerð bar tilætlaðan árangur þegar upp kom covid smit innan skólans og einungis eitt hólf af fjórum þurfti að fara í sóttkví, eða rétt rúmlega 20 einstaklingar.

Sóttkvíin bar einnig tilætlaðan árangur þegar einstaklingur sem þegar var í sóttkví greindist með covid smit.

Á meðan sóttkví varði hittust nemendur og starfsmenn daglega í netheimum og stunduðu námið af kappi.

Fjórtán daga sóttkví velflestra lauk á miðnætti í gærkvöld og það urðu fagnaðarfundir í morgun þegar nemendur og starfsmenn mættu aftur til starfa í hefðbundið skólastarf. Það er eflaust sérstök reynsla að vera í sóttkví og við viljum þakka forráðamönnum, nemendum og starfsmönnum sem tókust á við þetta sérkennilega verkefni af miklu jafnaðargeði og reyndu að gera það besta úr stöðunni. Við viljum einnig þakka heilbrigðsstarfsfólki og yfirvöldum fyrir samstarfið meðan á þessu stóð.“