Persónuvernd hefur sent Tryggingastofnun ríkisins (TR) bréf þar sem stofnunin er beðin um að taka til endurskoðunar það verklag sitt að skoða IP-tölur einstaklinga sem þiggja lífeyri frá stofnuninni í þeim tilgangi að fylgjast með staðsetningu þeirra.
Eins og DV greindi frá um helgina barst öryrkja, sem býr hluta ársins erlendis vegna heilsufars síns sem krefst þess að hann dveljist í heitara loftslagi en hér er, tölvupóstur frá TR þar sem segir að TR gruni að búseta einstaklingsins sé erlendis og að aðilar sem dveljist lengur en 6 mánuði erlendis á almanaksári missi rétt á heimilisuppbótinni. Öryrkinn bendir á að hann sé fastur erlendis vegna kórónuveirufaraldursins og hann sé ekki búinn að vera nema þrjá mánuði erlendis.
Tryggingastofnun telur sig vera í rétti til að fylgjast með IP-tölum og byggir á úrskurði Persónuverndar í máli frá árinu 2009. Öryrkjabandalagið hefur hins vegar bent á að gagnstæður úrskurður hafi fallið í slíku máli í nóvember í fyrra.
Persónuvernd hefur nú brugðist við og sent Tryggingastofnun svohljóðandi bréf:
„Efni: Ábending varðandi notkun Tryggingastofnunar ríkisins á upplýsingum um IP-tölur
Persónuvernd vísar til fjölmiðlaumfjöllunar undanfarna daga þar sem fram hefur komið að Tryggingastofnun ríkisins (TR) telji sér heimilt að skoða IP-tölur einstaklinga sem þiggja lífeyri frá stofnuninni til þess að fylgjast með staðsetningu þeirra. Þetta sé gert í þágu reglubundins eftirlits.
Samkvæmt þeim upplýsingum sem birst hafa um málið í fjölmiðlum hefur TR vísað, framangreindu til stuðnings, til niðurstöðu Persónuverndar í máli nr. 2009/635 hjá stofnuninni, en í því máli gerði Persónuvernd ekki athugasemd við skoðun Vinnumálastofnunar á þeim hluta IP-tölu sem hafði að geyma auðkenni þess lands sem IP-talan stafaði frá, þ.e. í rafrænni tilkynningu til stofnunarinnar um atvinnuleysi.
Með vísan til þessa vill Persónuvernd koma ábendingu á framfæri við TR um niðurstöðu stofnunarinnar í nýlegu máli sem einnig varðaði notkun Vinnumálastofnunar á upplýsingum um IP-tölur þeirra sem þiggja atvinnuleysisbætur, en málið er nr. 2018/1718 og var úrskurður í því kveðinn upp 28. nóvember 2019.
Í forsendum úrskurðarins er meðal annars vísað til þess að virkni VPN-tenginga og aðgengileiki þeirra dragi verulega úr áreiðanleika upplýsinga um IP-tölur einstaklinga að því leyti sem slíkar upplýsingar séu nýttar til að staðreyna staðsetningu hlutaðeigandi einstaklings. Þá hafi notkun VPN-tenginga aukist verulega og þekking á þeim sé orðin mun meiri og útbreiddari en áður.
Í ljósi þessa var það mat Persónuverndar að þau sjónarmið, sem byggt var á í eldri niðurstöðum stofnunarinnar um skoðun IP-tölu, ættu ekki lengur við. Var það niðurstaða Persónuverndar að upplýsingar um IP-tölur uppfylltu ekki kröfur 4. tölul. 1. mgr. 8. gr. laga nr. 90/2018, um persónuvernd og vinnslu persónuupplýsinga, hvað varðar áreiðanleika persónuupplýsinga. Var jafnframt lagt fyrir Vinnumálastofnun að láta af notkun upplýsinga um IP-tölur umsækjenda um atvinnuleysisbætur, á meðan ekki væru til úrræði til að staðfesta áreiðanleika þeirra.
Með vísan til alls framangreinds er Tryggingastofnun ríkisins leiðbeint um að taka núverandi verklag sitt við könnun á búsetu einstaklinga til skoðunar með hliðsjón af fyrrgreindri niðurstöðu Persónuverndar.
Ef óskað er leiðbeininga eða álits Persónuverndar á tilteknum atriðum í tengslum við framangreint er Tryggingastofnun ríkisins hvött til þess að senda Persónuvernd erindi þar að lútandi.“
