Hörður Björgvin Magnússon, landsliðsmaður í knattspyrnu hefur gert það gott í tæp tvö ár með stórliði, CSKA Moskvu í Rússlandi. Hörður gekk í raðir félagsins, sumarið 2018.

Áður lék þessi örfætti varnarmaður hjá Bristol City, í næst efstu deild á Englandi. Þar upplifði Hörður bæði góða og slæma tíma.

Hann ræddi þennan tíma við Ríkharð Óskar Guðnason á Stöð2 Sport í gær, miðað við frásögn Harðar upplifði hann hálfgert einelti frá Lee Johnson, þjálfara liðsins.

„Hann var búinn að taka mig rosalega mikið fyrir og setja mig upp við vegg og kenna mér um mörg mörk sem komu ekki einu sinni nálægt mér,“ sagði Hörður á Stöð2 Sport í gær

Hörður segir að þessi hegðun Johnson hafi gert honum auðveldara með að koma sér burt frá félaginu.

,,Hann þurfti að stilla einhverjum upp við vegg og hann tók mig. Ég var með breitt bak og hélt áfram en þetta gaf mér meira tækifæri til að koma mér í burtu sem fyrst. Ég vildi ekki missa þetta tækifæri.“