Það blasti heldur viðbjóðsleg sjón við Sæunni Ingibjörg Marinósdóttur, framkvæmdastjóra Veganmat ehf. og Vegan búðarinnar, þegar hún opnaði verslunina í morgun. Einhver óprúttinn aðili hafði kastað eggjum í glugga verslunarinnar í nótt.
Í samtali við DV segir Sæunn ekki taka skemmdarverkinu persónulega.
„Ég skil ekki hvers vegna fólk er svona. Af hverju var ekki notast við tómata, þurfti skemmdarvargurinn endilega að nota egg, sem við stöndum hundrað prósent gegn? Þetta er ógeðslegt. Eggin eru storknuð á glerinu og það verður mikil vinna að ná þessu af,“ segir hún.
Það eru engar myndavélar fyrir utan Vegan búðina. „En við þurfum greinilega að endurskoða það,“ segir hún.
Skemmdarverkið hefur vakið mikla reiði grænkera innan Facebook-hópsins Vegan Ísland. Sæunn deildi myndunum þar inni og skrifaði með:
„Þegar norminu er hnikað bregðast smásálirnar við […] Sorglega fyrirsjáanlegt.“
Þeir sem eru vegan neyta engra dýraafurða. Egg eru dýraafurð og er því litið á notkun eggja í árásinni sem sérstaklega kvikindislega.
