„Mér líður eins og ég sé einn í heiminum,” segir Hannes Guðmundsson, Íslendingur búsettur á Tenerife, en hann tók þessa mynd er hann ók eftir hraðbraut rétt hjá bænum Adeje. Vegurinn er auður svo langt sem augað eygir en þarna er vanalega mikil umferð.

Útgöngubann stendur yfir á Tenerife og yfirvöld á öllum Kanaríeyjum hafa gripið til sömu aðgerða. Hannes er ekki frá því að honum hugnist þessar harkalegu aðgerðir betur en aðgerðir íslenskra sóttvarnayfirvalda þó að hann hafi ekki sterkar skoðanir á því enda enginn sérfræðingur. En hann bendir á að mun færri hafa verið greindir smitaðir af veirunni á Tenerife þar sem býr einn milljón manna en á Íslandi, eða tæplega 200 manns.

„Mér líður skringilega og ástandið er súrealískt. En við höfum það öll samt gott og okkur skortir ekkert. Nóg af mat til í búðum og veðrið gott,“ segir Hannes en hann býr með eiginkonu og tveimur unglingum á Tenerife. Fjölskyldan var í heimsókn á Íslandi fyrir skömmu en sneri til baka í nær tómri vél Norwegian þann 15. mars.

Útgöngubannið er ekki jafnbókstaflegt og orðið gefur til kynna en allar óþarfar ferðir eru bannaðar og skólar lokaðir. „Við megum fara út í búð, apótek, banka, eða til læknis. Einnig til vinnu. Svo mega þeir sem eiga hunda fara með þá út í gönguferð. Nú væri gott að eiga hund til að hafa afsökun til að fara gönguferð,“ segir Hannes léttur en að hans sögn væsir ekki um fjölskylduna í útgöngubanninu. Þau verji tíma sínum í iðju sem Íslendingar eru vanir í vondum veðrum. Horfi til dæmis mikið á Netflix og krakkarnir séu í tölvum.

„Leiðinlegt fyrir krakkana að hanga heima, en þau mega ekki fara í skólann né stunda íþróttir og mega ekki hitta neinn, hvorki vini né skólafélaga. Ég er að vinna í fjarvinnu og í sambandi við alla á Íslandi og les bækur þannig að mér leiðist ekki. Svo fylgist maður með öllum fréttum og horfir á alla stöðufundi vegna kórónuveirunnar. Við Íslendingar erum innipúkar og vanir að dunda okkur innanhúss.“