„Faraldurinn er í vexti en ekki mjög miklum, en við erum á uppleið á kúrfunni,“ sagði Þórólfur Guðnason sóttvarnalæknir á upplýsingafundi um COVID-19 í dag. Smitaðir eru nú orðnir 409 talsins og hafa greinst 79 smit síðasta sólarhring, sem er svipaður fjöldi og sólarhringinn þar á undan.

Sýnin á veirufræðideild Landspítalans eru 13% jákvæð en svörunin í skimun Íslenskrar erfðagreiningar er enn bara um 1%.

Veiran hefur greinst í sex landshlutum, 4166 eru í sóttkví en tæp 600 hafa losnað úr sóttkvínni. Um 9000 sýni hafa verið tekin.

Þórólfur sagði að vöxtur faraldurins væri í samræmi við þau líkön sem stuðst hefði verið við. Þær aðgerðir sem beitt hafi verið sýndu árangur og þeim yrði beitt áfram: Að greina snemma, setja í einangrun og setja í sóttkví. Þórólfur sagði að sóttkvíin væri mjög mikilvæg því um helmingur þeirra sem hefðu greinst með veiruna hefðu áður verið í sóttkví. Ef þeir hefðu ekki verið í sóttkví hefðu þeir getað verið að breiða út veiruna í samfélaginu.

Þórólfur sagði jafnframt vera mjög brýnt að sá sem fer í sýnatöku sé í sóttkví þar til niðurstaða úr sýnatökunni liggur fyrir.

Nákvæm tölfræði um kórónuveirusmit er að finna á vefnum covid.is.