Landsréttur staðfesti í gær dóm yfir manni sem beitti fyrrverandi kærustu sína og vin hennar ofbeldi. Maðurinn sendi kærustunni ótal hótanir í sms og hótaði meðal annars að éta af henni andlitið.

Hinn ákærði veittist að manni á bílastæði við Bónus í Lóuhólum í Breiðholti og sló hann tvisvar með krepptum hnefa á munn og höku. Taldi mann manninn vera að halda við sína fyrrverandi kærustu.

Fyrir rétti var birtur langur listi af ógeðfelldum hótunum mannsins í garð konunnar í SMS-skilaboðum. Segir dómurinn að hótanirnar hafi verið til þess fallnar að valda konunni ótta um líf sitt.

Maðurinn var einnig sakfelldur fyrir umferðarlagabrot og fyrir að hafa rofið nálgunarbann.

Var dómur héraðsdóms, sem hljóðar upp á 18 mánaða fangelsi, staðfestur en auk þess var maðurinn sviptur ökuleyfi í fjóra mánuði.