Erlendur ferðamaður sem lést á Húsavík og reyndist sýktur af COVID-19 lést mjög skyndielga og einkenni hans bar brátt að. Eiginkona hans hefur einnig verið greind með veiruna og er hún í einangrun. Verið er að rannsaka dánarorsök mannsins og er ekki víst að hann hafi látist af COVID-19.

Þetta kom fram á daglegum upplýsingafundi um COVID-19 í Skógarhlíð í dag. Samkæmt nýjustu tölum frá sóttvarnalækni hafa nú 220 greinst með veiruna hérlendis og 220 eru í einangrun. Fjórir liggja inni á Landspítala, þar af tveir í gjörgæslu, en enginn er í öndunarvél.

Hlutfall jákvæðra sýna frá Veirufræðideild Landspítalans er 10% en aðeins 1% af þeim sýnum sem Íslensk erfðagreining hefur tekið. Tuttugu og tveir af þeim sem hafa verið greindir fóru í skimun hjá Íslenskri erfðagreiningu.

Alla tölfræði um COVID-19 smita er að finna á vefnum covid.is.