Kennari við Kvennaskólann í Reykjavík hefur greinst með kórónuveirusmitt. Þetta staðfesti Hjalti Jón Sveinsson skólameistari í samtali við DV. Að sögn hans kenndi kennarinn í tvo daga með einkenni veirunnar.

Allir nemendur kennarans eru núna í heimasóttkví. Að sögn Hjalta Jóns er um annars stigs smit að ræða en kennarinn smitaðist af einhverjum sem hafði verið erlendis. Ekki gat Hjalti Jón sagt til um hvort sá sem smitaði manninn hefði verið í skíðaferð í Austurríki eða Ítalíu, sagðist hreinlega ekki vita það, en staðfesti að smit mannsins hefði verið rakið.

Nemendur umrædds kennara eru allir í heimasóttkví en þó ekki allir nemendur og starfsfólk skólans. Eins og flestir vita er ekki kennt í Kvennaskólanum í samkomubanni frekar en öðrum framhaldsskólum og skrifstofa skólans er lokuð.

Aðspurður sagði Hjalti Jón að enginn nemandi við skólann hefði fundið fyrir einkennum og enginn hefði verið greindur með veiruna.