Í bænum Bergamo ríkir skelfingarástand vegna COVID-19 kórónuveirunnar. Í þessum 120.000 manna bæ var fólk jarðsett á hálftímafresti í yfirfullum kirkjugarðinum. Á venjulegum degi er ekki meira en ein síða með dánartilkynningum og minningargreinum í bæjardagblaðinu L‘Eco d‘ Bergamo. En undanfarna daga hafa síðurnar verið tíu.
Bergamo er í Langbarðalandi en þar hefur COVID-19 veiran verið skæðust fram að þessu. Í síðustu viku létust rúmlega 150 manns þar af völdum veirunnar.
Tíst á Twitter sýnir vel hversu ógnvænleg þróunin hefur verið. Sýnt er þegar dagblaði frá 9. febrúar er flett og sést þá að dánartilkynningar og minningargreinar taka eina síðu. Þennan dag höfðu yfirvöld aðeins skráð þrjú tilfelli af COVID-19. Því næst er blaði frá 13. mars flett. Þá höfðu 17.600 smit verið staðfest og 1.268 höfðu látist af völdum veirunnar. Á þessum degi tóku dánartilkynningar og minningargreinar tíu síður í blaðinu.
Impressionante! I necrologi sull'Eco di Bergamo, confrontati con quelli di un mese fa, danno l'idea dell'impatto in vite umane del #coronavirus pic.twitter.com/gTREDkDGPL
— Enrica Toninelli (@acirne) March 14, 2020
Enn fjölgar smituðum og dánum í héraðinu og álagið á heilbrigðiskerfið er gríðarlegt. The Telegraph segir að þetta hafi valdið því að sjúklingar eldri en 80 ára og þeir sem glíma almennt við slæmt heilsufar fái ekki meðhöndlun á sjúkrahúsm í héraðinu.
Christian Salaroli, læknir, sagði í samtali við ítalska dagblaðið Corriere della Sacra:
„Ef sjúklingur er 80-95 ára og með alvarlega öndunarörðugleika og fleiri en þrjú mikilvæg líffæri starfa ekki eðlilega þýðir það að dánartíðnin er 100 prósent. Við getum ekki gert kraftaverk.“
Samhliða því að dánartíðnin eykst í Bergamo aukast vandamálin. Útfarir hafa nú verið bannað og líkkistur hrúgast upp hjá útfararstjórum, í kapellum, í kirkjum og líkbrennslum sem starfa allan sólarhringinn til að reyna að halda í við þessa skelfilegu þróun. Áður en bann við útförum tók gildi fór að minnsta kosti ein útför fram á hálftímafresti í yfirfullum kirkjugarði bæjarins.
