Að sögn Andrésar Magnússonar, framkvæmdastjóra Samtaka verslunarinnar er fullkomlega óþarft að hamstra mat. Nægar birgðir bæði af innlendum og erlendum mat eru í landinu. Hamstur í verslunum skapar óþarfa álag á starfsfólk verslana. Einnig hafa lyfjabirgðir verið auknar í landinu og er bæði óþarft og skaðlegt að læknar ávísi meiri lyfjum en þörf krefur.
Þetta kom fram á upplýsingafundi um COVID-veiruna í dag.
Þórólfur Guðnason sóttvarnalæknir kynntir nýjar tölur varðandi kórónusmit. Færri greindust með veiruna síðasta sólarhring en sólarhringana á undan og sagði Þórólfur að búast mætti við sveiflum í smitum. Alls hafa 128 greinst og eru enn langflest smit rakin til skíðasvæða í Ölpunum. Þó hafa fleiri lönd bæst í hópinn, Sviss, Danmörk, England (London) og Bandaríkin. Innanlandssmit eru 30 og þrjú smit hefur ekki verið hægt að rekja nákvæmlega. Órekjanlegum smitum mun fjölga eftir því sem faraldurinn breiðist út.
Tveir liggja á Landspítalanum með veiruna, ekki er vitað um líðan þeirra en þeir eru ekki á gjörgæslu.
Brögð eru að því að einstaklingar í sóttkví hafi pantað tíma í skimum fyrir veirunni hjá Íslenskri erfðagreiningu. Er eindregið ráðið frá því vegna þess að neikvæð niðurstaða núna getur veitt falskt öryggi og viðkomandi verið kominn með veiruna síðar er hann finnur fyrir einkennum.
Upplýsingarvefurinn COVID.is hefur nú verið opnaður og hann geymir miklar upplýsingar fyrir almenning um veiruna.
