Nú getur almenningur skráð sig í skimunina en til þess þarf að fara inn á vefslóðina bokun.rannsokn.is. Þeir sem taka þátt í skimuninni munu fá upplýsingar um niðurstöðuna, óháð því hvort hún sé neikvæð eða jákvæð. Einnig mun fólk fá leiðbeiningar um hvernig það eigi að beita sér í framhaldinu.
„Nýja kórónaveiran sem veldur sjúkdóminum COVID-19 dreifist nú hratt um heiminn. Mikill meirihluti þeirra sem smitast finna aldrei fyrir alvarlegum einkennum. Til að varpa ljósi á útbreiðslu veirunnar hér á landi hefur sóttvarnalæknir, í samstarfi við sýkla- og veirufræðideild Landspítala og Íslenska erfðagreiningu, nú hafið skimun fyrir veirunni hjá almenningi.“
Fréttablaðið greinir frá því að hver tími taki um 15 mínútur og hægt er að bóka einn tíma fyrir fjölskyldu eða allt að sex manns í einu. Þá er nauðsynlegt að ttaka með sér persónuskilríki. Í kvöldfréttum Stöðvar 2 í gær sagði Kári Stefánsson, forstjóri Íslenskrar erfðagreiningar, að hann vonist til þess að hægt verði að skima allt að 400 manns á dag fyrir veirunni.
