Svona hefst pistill eftir Ólaf Þór Gunnarsson, lækni og þingmann VG, sem birtist á Vísi í dag. Ólafur fer yfir faraldurinn í pistlinum en hann er einnig með mikilvæg skilaboð sem allir ættu að taka til sín.
Það hefur komið fram að þeir sem eru viðkvæmastir í tengslum við faraldurinn eru þeir elstu og þeir sem hafa vissa langvinna sjúkdóma. Ekki vegna þess að þeir smitist frekar, heldur vegna þess að þeir eru líklegir til að þola sýkinguna verr ef þeir fá hana,“ segir Ólafur. Þá segir hann einnig að samfélagið þurfi að vera sérstaklega vakandi gagnvart þessum hópum.
„Bæði hvað það varðar að aðstoða þá eftir föngum sem ekki komast á milli, hjálpa með aðföng og fleira. Við þurfum líka að vera sérstaklega passasöm að bera ekki sýkingar á milli. Við þurfum að gæta að handþvotti, spritta okkur og forðast óþarfa snertingar.“
Ólafur kemur síðan með ráð sem fólk ætti að hafa í huga í þessum faraldri. „Notum tækni til samskipta þar sem það er hægt, jafnvel bara símann. Hringjum í ömmu, mömmu eða gamla frænku. Bjóðumst til að taka á okkur ytri samskipti eldra fólksins okkar, eins og innkaupaferðir og útréttingar. Förum í apótekið fyrir fólkið okkar. Sækjum póstinn. Bjóðum fram hjálp sem við getum flest svo auðveldlega veitt,“ segir hann.
„Með samstöðu og hjálpsemi, samhygð og nærgætni komumst við saman í gegnum þetta verkefni. Spilum þannig úr erfiðri stöðu að við styrkjum tengslin okkar inn á við og komum sterk út úr þessari krísu.“
