DV fékk í dag ábendingu þess efnis að Lögreglan á höfuðborgarsvæðinu hefði sent mestallt skrifstofufólk sitt heim vegna COVID-19. Starfsfólk sinnti vinnu sinni að mestu leyti að heiman.

DV bar þetta undir Gunnar Rúnar Sveinbjörnsson, upplýsingafulltrúa lögreglunnar, sem staðfesti ábendinguna. Gunnar segir:

„Já, það er rétt að töluverður hluti þeirra starfsmanna embættisins sem vinna við skrifstofustörf sinna nú verkefnum sínum að heiman. Samhliða hefur aðgengi innandyra á lögreglustöðvunum verið breytt tímabundið á meðan viðbragðsaðilar starfa á neyðarstigi. Sett hafa verið upp hólf á öllum lögreglustöðvunum til að vernda starfsemina eftir því sem kostur er. Þessum aðgerðum er ætlað að takmarka áhrif þess ef smit kemur upp hjá starfsmönnum Lögreglunnar á höfuðborgarsvæðinu.“