Íslenska kvikmynda- og sjónvarpsakademían (e. ÍKSA) hefur ákveðið að fresta afhendingu Edduverðlauna um óákveðinn tíma í ljósi kórónaveirunnar.
Hátíðin átti að fara fram þann 20. mars næstkomandi en fyrr í dag barst tilkynning til meðlima ÍKSA og segir þar að óskynsamlegt sé að halda mannfagnað á borð við Edduhátíðina miðað við þróun og útbreiðslu COVID-19 veirunnar.
Í tilkynningunni segir:
Því miður hafa mál þróast með þeim hætti að ekki þykir stætt á því að halda mannfagnað á borð við Edduhátíðina á meðan að kórónavírusinn ógnar samfélaginu. Það er samdóma álit og niðurstaða þeirra sem stýra hátíðinni að henni beri að fresta um óákveðinn tíma uns hlutir hafa skýrst og telja má víst að slík hátíðahöld geti gengið upp á ábyrgan hátt. Edduhátíðinni 2020 verður því frestað um óákveðinn tíma.
