Elliði Vignisson, bæjarstjóri í Ölfusi, segir á Facebook-síðu sinni að einhver tölvuþrjótur hafi nú í fimmta skiptið sent launafulltrúa hans tölvupóst og þóst vera hann. Í fljótu bragði virðist tölvupósturinn vera frá honum og er á íslensku, þó slæm sé.
Viðkomandi vill þó fá laun Elliða lögð inn á breskan bankareikning. Svo hljóðar bréfið:„Hæ, Hvenær er næsti útborgunardagur? Ég vil uppfæra launatékkareikninginn minn á breska bankareikninginn minn, vinsamlegasta ráð. Bestu kveðjur, Elliði Vignisson Bæjarstjóri.“
Sem betur fer þá lét viðkomandi ekki blekkjast. „Það er mikilvægt að verkferlar hjá fjármálastjórum og launafulltrúum séu skýrir og vandaðir, árásir eru algengar. Nú í morgun fékk launafulltrúinn minn neðangreindan póst frá „mér“ -sem ég þó sendi ekki-, með beiðni um að launagreiðslur mínar færu inn á reikning í Bretlandi. Þetta er í fimmta skipti sem reynt er að blekkja starfsmenn mér tengdum til að leggja inn á erlenda reikninga,“ skrifar Elliði.
https://www.facebook.com/photo.php?fbid=10158068227414181&set=a.94911884180&type=3
