Gunnar Smári Egilsson, fjölmiðlamaður og sósíalisti, hjólar í þá sem gagnrýna sífellt stafsetningu og málfar fólks. Hann segir þetta einn anga stéttarkúgunar:

„Þótt það hafi kannski eitthvað dregið úr því, sér maður samt enn fólk hér á Facebook draga niður skoðanir fólks fyrir að vera ekki rétt stafsettar eða málfræðilega réttar. Þetta er náttúrlega stéttakúgun, hinn skár setti hluti verkalýðsins er að berja á hinum lakar setta, líklega til að halda völdum sínum og stöðu í umræðunni.“

Hann spyr hvort eðlilegt sé að meta ávallt texta út frá stafsetningu. „Allt er það svo sem eðlilegt, ef fólk gætir þess ekki að halda afstöðu sinni við þá kúguðustu er það byrjað að kúga áður en það veit af. En ég ætlaði svo sem ekki að fara út í þá sálma, heldur var ég að lesa áðan hér á Facebook kröftugan texta sem tjáði skarpa sýn á samfélagið en var skemmtilega vitlaus þegar hann var metinn sem stafsetningarpróf,“ segir Gunnar Smári.

Hann veltir því upp hvort vísvitandi villur verði það sem koma skal. „Þegar ég las velti ég fyrir mér hvort þess væri langt að bíða að íslenskt lágstéttarfólk brygðist við eins og svartir í Bandaríkjunum, sem hafa mátt þolað svona menningarkúgun vegna skemmri skólagöngu og minni tengsla við þann menningarheim sem þar er innrættur nemendum; en viðbrögð þeirra var að gera stafsetninguna að baráttutæki og skreyta sig með frjálslegri stafsetningu, skrifa nafnið sitt sem GunnnAr Zmāry, svo ég leyfi mér menningarnám, að nota þá stafi sem fólki finnst smartari, tilkomumeiri eða fyndnari … ekki bara þá sem eru réttari.“