Manchester United vann gríðarlega mikilvægan sigur í ensku úrvalsdeildinni í gær er liðið mætti Manchester City. United er í harðri baráttu um Meistaradeildarsæti og var sex stigum frá Chelsea fyrir leikinn í gær.

Chelsea lagði Everton 4-0 en United tókst að svara og lagði grannana sína 2-0 á Old Trafford. Leikurinn var ágætis skemmtun en tvö mörk voru skoruð og það voru heimamenn sem gerðu þau bæði. Anthony Martial skoraði fyrra markið á 30. mínútu eftir laglega aukaspyrnu Bruno Fernandes. Ederson í marki City hefði þó mátt gera betur.

Ederson gerði sig svo sekan um önnur mistök í uppbótartíma er hann henti boltanum á Scott McTominay sem þakkaði pent fyrir sig og skoraði í autt markið af löngu færi.

Eiður Smári Guðjohnsen var sérfræðingur Símans, eftir leikinn. Hann líkti sóknarleik City við kynlíf. ,,„Ég veit ekk hvort ég eigi að þora að segja þetta, Þetta virkar svolítið eins og kynlíf án þess að fá fullnægingu,“ sagði Eiður léttur í lund en mbl.is birtir myndskeið af þessu.

„Þeir þurfa að keyra fyrr á markið. Þetta er rosalega flott. Þeir halda boltanum vel og hreyfa sig vel í kringum hvorn annan en það vantaði aðalatriðið.“