Alma Möller landlæknir segir að slíkt yrði einstakt á heimsvísu. Kári segir að það eigi eftir að ákveða hvernig skimunin mun fara fram hjá Íslenskri erfðagreiningu en hann tjáði sig um málið í viðtali á Rás 2 í dag.
„Hugmyndin er að gera þetta bara eins og það er gert núna á Landspítalanum, að menn myndu búa til einhvers konar drive-through þar sem fólk keyrði að einhverjum stað, þar sem að það myndi stinga hausnum út um gluggann og fólk sem væri klætt í réttan varnarbúnað með grímu og sloppa og hanska myndi taka úr þeim sýni úr nefholi,“ sagði Kári.
Kári sagði þá einnig að hjá Íslenskri erfðagreiningu sé rannsóknarstofa sem henti vel til skimunar á veirunni. „Við getum gert þetta tiltölulega hratt og finnst alveg sjálfsagt að slást í hópinn með þeim sem eru að reyna að búa til skilning á þessu.“
Þá segir Kári að Íslensk erfðagreining muni senda frá sér tilkynningu á næstunni um að allir með einkennni í efri öndunarfærum, kvef eða hálsbólgu geti komið í skimun hjá Íslenskri erfðagreiningu.
