Matthías Tryggvi Haraldsson, meðlimur hljómsveitarinnar Hatara og sviðshöfundur, og Eva Rún Snorradóttir, sviðslistakona og rithöfundur, hafa verið valin sem leikskáld Borgarleikhússins. Þau Matthías og Eva voru valin úr hópi 42 umsækjenda og taka þau við af Þórdísi Helgadóttur sem hefur verið leikskáld Borgarleikhússins síðastliðið ár.

Eva Rún Snorradóttir er sjálfstætt starfandi sviðslistakona og rithöfundur. Hún útskrifaðist með B.A gráðu frá Listaháskóla Íslands, Sviðshöfundabraut vorið 2008. Eva Rún er ein af stofnendum og listrænum stjórnendum Framandverkaflokksins Kviss búmm bang og Sviðslistahópsins 16 elskenda. Eva Rún hefur gefið út þrjár ljóðabækur: Heimsendir fylgir þér alla ævi, 2013, Tappi á himninum, 2016 og Fræ sem frjóvga myrkrið, 2018. Fræ sem frjóvga myrkrið hlaut Maístjörnuna, verðlaun fyrir bestu ljóðabókina árið 2018. Eva Rún starfar reglulega sem stundarkennari og leiðbeinandi við Sviðslistadeild LHÍ. Eva Rún er ein af listrænum stjórnendum alþjóðlegu leiklistarhátíðarinnar LÓKAL.

Matthías Tryggvi Haraldsson útskrifaðist með BA sem sviðshöfundur frá LHÍ 2018. Hann var tilnefndur sem sproti ársins í Grímuverðlaununum 2019 fyrir sýninguna Griðarstaður. Hann skrifaði verkið Stóri Björn og kakkalakkarnir sem valið var í NÚNA 2019 í Borgarleikhúsinu og var einnig valinn núna á dögunum sem fulltrúi Íslands á leikritunarhátíðinni Cut the Card í Bretlandi. Matthías er meðlimur hljómsveitarinnar HATARI sem keppti fyrir hönd Íslands á Eurovision á seinasta ári.

Eva og Matthías feta í spor þeirra Auðar Jónsdóttur, Jóns Gnarr, Kristínar Marju Baldursdóttur, Tyrfings Tyrfingssons, Sölku Guðmundsdóttur, Björns Leós Brynjarssonar og nú síðast Þórdísar Helgadóttur.