Á laugardaginn er væntanleg vél Icelandair til Keflavíkur frá Veróna á Ítalíu. Innanborð verða 74 farþegar sem hafa verið í fríi á Ítalíu á vegum ferðaskrifstofanna Vita og Úrval Útsýn. Að sögn Hauks Reynissonar, flugstjóra hjá Icelandair, verður áhöfnin um borð klædd í hlífðarfatnað og engin þjónusta verður um borð. Farþegum verður þó boðið upp á að grípa með sér hressingu í dyrunum er þeir koma um borð í flugvélina. Starfsfólkið verður fremur í hlutverki öryggisfulltrúa en þjónustufólks.

Þetta kom fram í viðtali Bylgjunnar við Hauk í dag, í þættinum Reykjavík síðdegis.

Haukur segir að þetta sé unnið í samráði við Sóttvarnalækni og Landlækni og algjörlega farið að tilmælum þeirra. Móttaka fólksins á Keflavíkurflugvelli verður síðan í höndum heilbrigðisyfirvalda, en Isavia og Sóttvarnalæknir skipuleggja móttöku fólksins.

Fram kom í viðtalinu við Hauk að flugvélar eru ekki eins smitnæmt umhverfi og t.d. vistarverur á jörðu niðri. Dreifast bakteríur í flugvél eina til tvær sætaraðir fram og aftur. Loftflæði í flugvélinum er mikið.