Clara Lemaire Anspach, dóttir kvikmyndagerðarkonunnar Sólveigar Anspach, á ekki í langt að sækja hæfileika sína en um þessar mundir vinnur hún hörðum höndum að heimildamynd um móður sína.

Heimildamyndin heitir Sólveig mín og segir í henni frá ferli og ævi Sólveigar. Leikstýran sáluga sérhæfði sig í heimildamyndagerð framan af ferlinum en sneri sér svo í auknum mæli að leiknum myndum. Meðal mynda hennar eru „Haut les cæurs“, Nakin Lulu og Stormviðri sem var valin til þátttöku á kvikmyndahátíðinni í Cannes árið 2003.

Reiknað er með frumsýningu heimildamyndarinnar síðar á þessu ári en Clara vinnur að myndinni ásamt Körnu Sigurðardóttur. Þau Ingvar E. Sigurðsson, Didda Jónsdóttir og Óttarr Proppé eru á meðal þeirra sem skjóta upp kollinum í myndinni, en verkið er klippt af Elísabetu Ronaldsdóttur, sem hefur gert garðinn frægan í Hollywood síðastliðin ár.