Afstaða, félag fanga og annarra áhugamanna um bætt fangelsismál og betrun, hvetur fanga til að sinna hreinlæti af alúð, þrífa bæði og vistarverur sínar vandlega, en minnir á að bannað er að hafa handspritt undir höndum í fangelsum. Afstaða hefur undanfarið fungað með Fangelsismálastofnun um viðbrögð við COVID-19 veirunni og mögulegri útbreiðslu hennar í fangelsum. Félagið hefur birt eftirfarandi tilkynningu um þessi mál:

Tilkynning til vistmanna fangelsa

Afstaða og Fangelsismálastofnun hafa í dag fundað um COVID-19 veiruna og mögulega útbreiðslu hennar í fangelsum landsins. Fundurinn var afskaplega gagnlegur og fóru starfsmenn stofnunarinnar ítarlega yfir þá aðgerðaráætlun sem virkjuð verður komi til þess að ástandið fari á svonefnt neyðarstig. Án þess að útskýra í smáatriðum áætlunina er ljóst að heilbrigðisstarfsfólk mun sinna þeim þáttum sem lúta að veikindum vegna veirunnar.

Afstaða getur með góðu móti fullyrt að aðgerðaráætlun Fangelsismálastofnunar er vel úr garði gerð en engu að síður mun félagið fylgjast grannt með gangi mála og sína aðhald til hins ítrasta enda hvergi gefið eftir þegar kemur að heilsufari fanga og fangavarða í landinu.

Félagið hvetur alla þá sem vistaðir eru í fangelsum eða starfa við þau til að halda ró sinni, þrífa bæði sig og vistarverur vandlega. Þar sem augljóslega er ólöglegt að hafa handspritt með höndum í fangelsum er mikilvægt að sinna handþvotti af alúð með sápu og reglulega. Þá er mikilvægt að skipta oft um handklæði, þvo borðbúnað af natni, þurrka vel og geyma allt á vísum stað, þannig að ekki noti fleiri sömu ílát og áhöld. Hvað varðar líkamsræktarsali þá er gríðarlega mikilvægt að þrífa tæki og tól með þeim hreinlætisvörum sem eru til taks. Ekki er mælt með handaböndum eða faðmlögum.

Afstaða mun á næstunni fara í lokuðu fangelsin til þess að fara yfir þessi mál með vistmönnum þar. Félagið áréttar að engin ástæða er til að fara í uppnám vegna COVID-19 veirunnar en mikilvægt að allir séu vel upplýstir, framfylgi þeim fyrirmælum sem eru veitt og sýni samföngum og starfsfólki virðingu. Þessi staða í samfélaginu er EKKI ástæða til þess að láta undan freistingum í lyf eða önnur vímuefni, þvert á móti er mun heillavænlegra að hafa höfuðið rétt skrúfað á.

Þá er rétt að það komi fram að Afstaða sinnir að sjálfsögðu þjónustu við aðstandendur og mun veita upplýsingar um það hvernig mál standa þegar eftir þeim er leitað.

Virðingarfyllst,

Guðmundur Ingi Þóroddsson
formaður Afstöðu