Ragnar Þór Ingólfsson, formaður VR, segist uggandi eftir flug með Icelandair til Íslands. Hann segist hafa tekið eftir því að lesefni um borð sé augljós smithætta á veirunni alræmdu, COVID-19. Hann hvetur flugfélagið að huga sinn gang.

„Í flugvélum Icelandair er að finna matseðla og Saga bæklinginn ofl. Sem er vandlega komið fyrir í plasti. Þessu lesefni, sem ætlað er farþegum til að panta sér mat og drykk eða versla, er auðsjáanlega hvorki endurnýjað eða þrifið nema að litlu leiti,“ segir Ragnar.

Honum segist ekki hafa verið um sel eftir þetta. „Ég kom til landsins með vél Icelandair frá Munchen á mánudag, ekki frá hættusvæði en einhverjir smitaðir hafa komið með þessum vélum dagana áður, og get ég fullyrt að þegar ég tók upp áðurnefnda bæklinga varð mér ekki um sel. Þeir voru drulluskítugir, krumpaðir og kámugir og plöstin litlu skárri og litu út eins og að hafa verið á biðstofu á annasömum stað í c.a. áratug eða meira. Ég hvet Icelandair til að gera viðeigandi ráðstafanir. Svo því sé haldið til haga þá sprittaði ég mig í bak og fyrir eftir að hafa snert á þessum ófögnuði.“