Skömmu eftir miðnætti í nótt var lögreglu tilkynnt um líkamsárás á Skólavörðustíg í Reykjavík. Tveir menn réðust á einn og veittu honum áverka. Maðurinn er talinn vera nefbrotinn og var hann fluttur með sjúkrabíl á Bráðamóttöku.  Árásarmenn voru farnir af vettvangi en vitað er hverjir þeir eru.

Þetta kemur fram í dagbók Lögreglunnar á höfuðborgarsvæðinu. Þar segir einnig frá því að skömmu fyrir klukkan 2 í nótt var tilkynnt um að maður hefði ekið á brunahana í Fossvogi og brotið hann niður. Mikið vatnsrennsli var um götur og göngustíga og mögulegar skemmdir á húsum. Ökumaðurinn ók af vettvangi en var stöðvaður skömmu síðar.  Ökumaðurinn er grunaður um ölvun við akstur og var hann vistaður fyrir rannsókn máls í fangageymslu lögreglu.  Orkuveita og slökkvilið komu á vettvang til að loka fyrir vatnið og reyna að  koma í veg fyrir skemmdir á húsnæði.