Aðstoðarkona fjármálaráðherra, Svanhildur Hólm Valsdóttir, er meðal þeirra sem hafa sótt um stöðuna. Sú ákvörðun hefur vakið mikla athygli en margir hafa velt því fyrir sér hvort Svanhildur muni fá stöðuna vegna tengsla sinna.
Svanhildur hefur um árabil verið aðstoðarmaður Bjarna Benediktssonar og er dyggur stuðningsmaður Sjálfstæðisflokksins. Hljóti hún starfið mun fólk eflaust velta því fyrir sér hvort hún hafi fengið stöðuna sökum hæfis, eða tengsla.
Eiríkur Jónsson, fjölmiðlamaður og fyrrverandi ritstjóri, telur þó að Svanhildur muni ekki fá starfið. Hann er með kenningu um að Sjálfstæðisflokkurinn sé með stærri áform þegar kemur að Svanhildi.
„Svanhildur á ekki eftir að hreppa hnossið enda aldrei staðið til,“ segir Eiríkur um málið á vefsíðu sinni. „Umsókn hennar er liður í fléttu sem endar að öllum líkindum í Washington. Með því að ráða hana ekki sem útvarpsstjóra sýnir Sjálfstæðisflokkurinn að hann hygli ekki sínum og gerir auðveldara að skipa Svanhildi sendiherra í Washington þegar Geir Haarde hættir innan tíðar.”
Hvað segja lesendur? Gæti þetta verið rétt hjá Eiríki?
