Fyrirtækið Zephyr Iceland hefur sótt um leyfi til að setja upp búnað til mælinga á vindaðstæðum á Syðri Fljótum og Slýjum í Meðallandi. Fyrirtækið er að kanna fýsileika þess að koma upp vindorkugarði á svæðinu. Sveitarstjórn Skaftárhrepps hefur tekið jákvætt í umsókn fyrirtækisins um að fá að setja mælibúnaðinn upp.

Morgunblaðið skýrir frá þessu. Í Meðallandi eru góðar vindaðstæður sem bjóða upp á mikið afl en á móti kemur að töluverð vegalengd er í flutningskerfi raforku hefur blaðið eftir Katli Sigurjónssyni, framkvæmdastjóra Zephyr Iceland.

Fram kemur að fyrirtækið hafi skoðað aðstæður á fleiri stöðum hér á landi og rætt við landeigendur en ekki hafi verið teknar neinar ákvarðanir um byggingu vindorkugarða. Haft er eftir Katli að umsóknir um rannsóknarleyfi og vindmælingar séu nú hjá nokkrum sveitarstjórnum og nái þær til um tíu svæða. Hann vildi ekki skýra frá hvaða svæði væru helst til skoðunar.

Að hans sögn getur ferli rannsókna og leyfisveitinga tekið töluverðan tíma og ýmislegt sé óljóst í tengslum við lagaumgjörð og hvort vindorka falli undir rammaáætlun. Þegar rannsókna- og leyfisferli er lokið getur vindorkugarður risið á tiltölulega skömmum tíma miðað við vatnsorku og jarðvarma.

Töluverð fjárfesting er í vindorkugörðum en haft er eftir Katli að miðað við markaðsaðstæður hér á landi sé ólíklegt að hver vindorkugarður verði stærri en um 50 megavött en það eru um 12 vindmyllur. Það kallar á um 10 milljarða króna fjárfestingu í hverjum vindorkugarði.