Nú þegar níu dagar eru liðnir frá óveðrinu sem skall á í síðustu viku er staðan á flutningskerfi rafmagns enn viðkvæm og þá er veðurspá fyrir austan ekki góð. Þetta kemur fram í tilkynningu frá Landsneti.

Gul viðvörun er í gildi vegna veðurs á austanverðu landinu; Norðurlandi eystra, Austurlandi að Glettingi, Austfjörðum og Suðausturlandi. Búist er við stormi eða hríðarveðri á þessum slóðum í dag og fram á nótt.

Svona er staðan á flutningskerfinu samkvæmt tilkynningu Landsnets:

Suðurnesjalína 1
Fundist hefur skemmdur einangrari í línunni við Fitja. Ástand hans er þannig að fara þarf í viðgerð og er áætlað að línan fari úr rekstri í um þrjár klukkustundir frá klukkan 10. Fyrirhugað er að hafa Reykjanes í sjálfstæðri einingu aðskilið frá meginflutningskerfinu á meðan viðgerð stendur. Ef allt gengur að óskum eiga notendur ekki að finna fyrir truflunum.

Tengivirkið í Hrútatungu

Tengivirkið var hitamyndað í gær og ennþá mælist töluverð selta. Metið verður nánar í dag hvort fara þurfi í frekari hreinsun á virkinu.

Dalvíkurlína 1

Viðgerð lauk í gær og var línan spennusett um kl. 18:30. Rafmagn frá flutningskerfinu er því komið á Dalvík.

Kópaskerslína 1

Viðgerð gekk vel í gær og hafa nú allir staurar verið reistir. Í gærkvöldi komu 10 menn til viðbótar í hópinn frá viðgerðarhóp Dalvíkurlínu. Spáin á svæðinu fyrir föstudaginn er ekki góð og er því stefnt á að nýta daginn í dag eins vel og hægt er. Enn er áætlað að viðgerð verði lokið um helgina.

Fljótsdalslína 4

Bilun varð á línunni í gær þegar festing, sem tengir skálakeðju, brotnaði. Við nánari skoðun í gær kom í ljós að mastrið hefur skemmst í toppinn og fara þarf í lagfæringar á því fyrst. Viðgerð gæti því tekið nokkra daga.