Héraðsdómur Reykjavíkur hefur dæmt karlmann á fimmtugsaldri í fimm mánaða óskilorðsbundið fangelsi fyrir umferðarlagabrot, fjársvik og lyfja- og tollalagabrot.
Maðurinn var meðal annars ákærður fyrir að flytja til landsins töluvert magn sterkra verkjalyfja og annarra lyfja. Maðurinn var stöðvaður í Leifsstöð þann 4. nóvember 2017 þegar hann kom til landsins frá Alicante á Spáni. Í fórum hans fundust 274 töflur af Contalgin, 54 töflur af Oxycontin, 175 töflur af Alprazolam, 41 tafla af Medikiniet og 54 töflur af Valíum. Lyfin fundust við leit í farangri mannsins, nærfötum og innvortis í líkama hans.
Þá var maðurinn ákærður fyrir að nota stolið greiðslukort þegar hann greiddi fyrir varning í nokkrum verslunum árið 2017. Um var að ræða sex færslur, samtals að fjárhæð 89 þúsund krónur. Loks var hann ákærður fyrir að aka í eitt skipti undir áhrifum fíkniefna.
Maðurinn játaði sök fyrir dómi en sakaferill hans nær aftur til ársins 1995. Auk þess að sæta fimm mánaða fangelsi var manninum gert að greiða þóknun verjanda síns, 120 þúsund krónur og rúmar 100 þúsund krónur í annan sakarkostnað.
