„Ég er ennþá í hálfgerðum doða eða sjokk fasa. Þannig að kannski er þetta ekki að valda mér jafn miklu persónulegum hugarangri og öðrum. Ég er eiginlega meira reiður fyrir hönd fjölskyldu og vina,“ segir Helgi Laxdal í viðtali við Hringbraut.
Þar er greint frá raunum Helga og fjölskyldu hans en faðir Helga var jarðaður fyrir stuttu. Aðstandendur eru sárir, svekktir og reiðir eftir framkomu og afskiptaleysi þeirra sem komu að jarðarförinni.
Í frétt Hringbrautar kemur fram að aðdragandann megi rekja til þess að athöfn föður Helga fór fram í Svalbarðskirkju í heimasveit feðganna. Jarðsetningin sjálf fór hins vegar fram frá Laufáskirkju í Grýtubakkahreppi, heimasveit móður Helga.
Fyrir útförina hafði Helgi haft samband við Önnu Maríu Snorradóttur, meðhjálpara Svalbarðskirkju. Hún sagði við Helga að hún myndi ekki vera viðstödd útförina sjálfa en hún lofaði honum að hún myndi sjá til þess að allt yrði klárt við komu þeirra í kirkjuna.
Þegar Helgi mætti upp í Svalbarðskirkju var kirkjan hins vegar ekki opin. Það var enginn til staðar til að taka á móti aðstandendunum og kirkjuklukkunum var ekki hringt. „Við urðum að hringja í eiginmann meðhjálparans til að koma og opna húsið,“ sagði Helgi.
Þegar kistunni hafði verið komið fyrir á réttum stað var ekkert að gera nema að bíða til morguns en þá fór athöfnin fram. Enn var ekki búið að ná í mold út í kirkjugarðinn svo einn aðstandendanna þurfti að gera sér ferð þangað sjálfur til að ná í moldina. En það versta var ekki búið. Þannig var ekki búið að flagga í hálfa stöng eins og beðið var um, hliðið af þjóðveginum inn á lóðina var lokað og enginn var á staðnum. Búið var að gera gröfina en stór grafa stóð enn við gröfina. Kirkjan var lokuð og læst, og allt sem þurfti fyrir jarðarförina var geymt inni í læstri kirkjunni.
Helgi kveðst mjög ósáttur vegna málsins. „Þetta er ekki boðlegt fyrir syrgjendur, sama hvernig á þetta er litið.“
