Líkt og fram kom í dag hefur Borgarleikhúsið verið dæmt til að greiða Atla Rafni Sigurðssyni leikara samtals 6,5 milljónir króna, þar af 5,5 milljónir í bætur og eina milljón í málskostnað.

Atli var í desember 2017 rekin frá Borgarleikhúsinu vegna fjölda ásakana um kynferðislega áreitni. Atli vísaði þessum ásökunum á bug.

Sjá einnig: Atli Rafn lagði Borgarleikhúsið – Fær milljónir í bætur

Femínistinn Þórdís Elva birti í kvöld færslu á Facebook-síðu sinni þar sem hún gagnrýnir þessar bætur Atla Rafns harðlega.

Í færslunni talar hún um leikkonur sem hún þekki sem hafa þurft að ganga í gegnum ansi erfiða tíma, en virðast ekki hafa haft rétt á neinu.

„Ég þekki leikkonur sem voru neyddar til að leika í gamansýningum með dáið barn í maganum og brostið hjarta, og hættunni á að það færi að sturtublæða í miðri sýningu, en þær fengu ekki frí til að syrgja og láta skafa út fóstrið. Ég þekki leikkonur sem hafa verið reknar úr hlutverkum sínum því þær fitnuðu, því röddin á þeim fór í taugarnar á einhverjum, eða ‘af því bara’. Ég þekki leikkonur sem voru látnar leika á sviði við hlið manna sem káfuðu á kynfærum þeirra, jafnvel eftir að þær sögðu frá því. Ég þekki leikkonur sem voru reknar rétt fyrir frumsýningu því þær voru ‘of vel undirbúnar’ og það ógnaði egói leikstjórans. Réttur þeirra var, að því er virtist, enginn. Svo kemst stjórnandi að því að fjórar starfskonur eru hræddar við einn og sama leikarann, því í sjö mismunandi tilvikum hafi konum fundist mörkum sínum vera misboðið af hans hálfu, að þeirra sögn.“

Þórdís leggur þó sérstaka áherslu á það að Atli Rafn fái bætur hærri en nokkurt nauðgunarbrotaþoli í Íslandssögunni. Hvort sem Atli hafi brotið af sér eður ei þá þykir Þórdísi sorglegt að fórnarlömb nauðgana fái samt minni bætur.

„Maðurinn er látinn fara. Nú eru honum dæmdar hærri bætur en nokkur nauðgunarbrotaþoli í sögu landsins hefur fengið. Hærri en 17 ára stúlkan sem var haldið fanginni og nauðgað heila helgi. Hærri en allir hópnauðgunarþolendur Íslands, líka þær sem smituðust af ólæknandi sjúkdómi við ofbeldið. Hærri en allir sem hafa verið misnotaðir og sviptir æsku sinni. Burtséð frá sekt eða sakleysi einstakra manna er þessi heildarmynd rammskökk.“