Ný kvikmynd er væntanleg þar sem Elísabet Ronaldsdóttir, einn eftirsóttasti klippari landsins, leikur listir sínar. Kvikmyndin sem um ræðir heitir Playing with Fire og segir frá slökkviliðsmönnum sem reyna að koma böndum á þrjá óþekka krakka. Með helstu hlutverk fara þeir John Cena, Keegan-Michael Key og John Leguizamo. Elísabet hefur gert garðinn frægan upp á síðkastið með stórvinsælum kvikmyndum á borð við John Wick, Atomic Blonde og Deadpool 2. Elísabet hefur þó ekki eingöngu haldið sig við erlend verkefni á síðustu misserum og klippti einnig íslensku kvikmyndirnar Svanurinn og Vargur. Playing with Fire verður frumsýnd á Íslandi í byrjun árs 2020.